(ยตฺถ ฆานายตนํ อุปฺปชฺชติ ตตฺถ มนายตนํ ธมฺมายตนญฺจ เอกสทิสํ, นานํ นตฺถิ, อุปริ ปน วารสงฺเขโป [อุปริวาเร สงฺเขโป (สฺยา.), อุปริวาเร สงฺเขปํ (สี. ก.)] ตีติ ชานิตพฺพํฯ)

(ก) ยตฺถ ฆานายตนํ อุปฺปชฺชติ ตตฺถ ธมฺมายตนํ อุปฺปชฺชตีติ? อามนฺตาฯ

(ข) ยตฺถ วา ปน ธมฺมายตนํ อุปฺปชฺชติ ตตฺถ ฆานายตนํ อุปฺปชฺชตีติ?

รูปาวจเร อรูปาวจเร ตตฺถ ธมฺมายตนํ อุปฺปชฺชติ, โน จ ตตฺถ ฆานายตนํ อุปฺปชฺชติฯ กามาวจเร ตตฺถ ธมฺมายตนญฺจ อุปฺปชฺชติ ฆานายตนญฺจ อุปฺปชฺชติฯ (ฆานายตนมูลกํ)

[24] (ก) ยตฺถ รูปายตนํ อุปฺปชฺชติ ตตฺถ มนายตนํ อุปฺปชฺชตีติ?

อสญฺญสตฺเต ตตฺถ รูปายตนํ อุปฺปชฺชติ, โน จ ตตฺถ มนายตนํ อุปฺปชฺชติฯ ปญฺจโวกาเร ตตฺถ รูปายตนญฺจ อุปฺปชฺชติ มนายตนญฺจ อุปฺปชฺชติฯ

(ข) ยตฺถ วา ปน มนายตนํ อุปฺปชฺชติ ตตฺถ รูปายตนํ อุปฺปชฺชตีติ?

อรูเป ตตฺถ มนายตนํ อุปฺปชฺชติ, โน จ ตตฺถ รูปายตนํ อุปฺปชฺชติฯ ปญฺจโวกาเร ตตฺถ มนายตนญฺจ อุปฺปชฺชติ รูปายตนญฺจ อุปฺปชฺชติฯ

(ก) ยตฺถ รูปายตนํ อุปฺปชฺชติ ตตฺถ ธมฺมายตนํ อุปฺปชฺชตีติ? อามนฺตาฯ

(ข) ยตฺถ วา ปน ธมฺมายตนํ อุปฺปชฺชติ ตตฺถ รูปายตนํ อุปฺปชฺชตีติ?

อรูเป ตตฺถ ธมฺมายตนํ อุปฺปชฺชติ, โน จ ตตฺถ รูปายตนํ อุปฺปชฺชติฯ ปญฺจโวกาเร อสญฺญสตฺเต ตตฺถ ธมฺมายตนญฺจ อุปฺปชฺชติ รูปายตนญฺจ อุปฺปชฺชติฯ (รูปายตนมูลกํ)

[25] (ก) ยตฺถ มนายตนํ อุปฺปชฺชติ ตตฺถ ธมฺมายตนํ อุปฺปชฺชตีติ? อามนฺตาฯ

(ข) ยตฺถ วา ปน ธมฺมายตนํ อุปฺปชฺชติ ตตฺถ มนายตนํ อุปฺปชฺชตีติ?

อสญฺญสตฺเต ตตฺถ ธมฺมายตนํ อุปฺปชฺชติ, โน จ ตตฺถ มนายตนํ อุปฺปชฺชติฯ จตุโวกาเร ปญฺจโวกาเร ตตฺถ ธมฺมายตนญฺจ อุปฺปชฺชติ มนายตนญฺจ อุปฺปชฺชติฯ (มนายตนมูลกํ)

(ค) อนุโลมปุคฺคโลกาสา

[26] (ก) ยสฺส ยตฺถ จกฺขายตนํ อุปฺปชฺชติ ตสฺส ตตฺถ โสตายตนํ อุปฺปชฺชตีติ?

สจกฺขุกานํ อโสตกานํ อุปปชฺชนฺตานํ เตสํ ตตฺถ จกฺขายตนํ อุปฺปชฺชติ, โน จ เตสํ ตตฺถ โสตายตนํ อุปฺปชฺชติฯ